Good Friday Jisu Cross o thwimani Sal de ?

“Good Friday” Sal Jisu thwimani sal de klai ?

Chini Church (Motha) o cherai phuru ni simi phwrwngjagwi eba sajagwi phaio “Good Friday” wngkha Jisu thwimani sal , O Good Friday ni salo chini Jisu khristo chini sumsok ni bagwi thwi rwkha.

- kubui de “Good Friday” Jisu thwimani sal  klai ?
- Phiya Bible o “Good Friday” hwnwi swijak kwrwi blasa ?
- Jisu thwimani Sal-o Bible “Good Friday” hwnwi swiya blasa ?

omo hai kwbangmani swngmung tongo , tei swngwi tongo .

Aboni bagwi phaidi saui manlai anw Chwng Christian rok tamoni bagwi “Good Friday” no palai lai .

Tho himdi….
nailainai swkang “Good Friday” bahai khe chengkha …

1st Century o Church tongma rok “Friday” phasal o Special Surilaimung hwnwi okbukcha eba Fasting surilai-o,
abo 1st Century ni simi 4th century jora , aboni yagulo o Church (Roman Catholic Church) ni khoroksa bukhuk Egeria
( spain ni) , Palm Sunday ni simi Ester Sunday jora je sal no kaham khe wansugui 8 Days/sal no kwthar (Holy week) hwnwi sakha , tei  Friday/Phasal sal no Jisu thwimano rwgwi “Good Friday” hwnwi pharjakha tei Jerusalem- o o sal rokno palai jakha….

“Good Friday” Jisu thwimani sal klai-ya phiya Jisu thwimano no muitu khlaima sal se klai-o , Egeria tei Church ni koktwi khe Jisu thwimani May-20 – April-20 ni bisingo klaio hwnwi.

Tabuk ………..
Phiya “Good Friday” Bible o swijak kwrwi blasa ?
Aw soino “Good Friday” Bible o swijak kwrwi , haiphano Bible omo sao

“ 5. Bo wanamasingcha samung khlaimarokno muitu khlai di, bini soidomni samungrokno tei bini khukni buj sakhlaima rokno muitu khlai di”
( LOBMUNG-105:5)

“11.Ang subraiyungni samungrokno muitu khlainai; swkango nwng soidomni samung khlaimarokno ang muitu khlainai .” (LOBMUNG-77:11)

Ang Jisu ni thwimano se muitu khlai-o phiya ang  palai-ya . omo haikheno o “Good Friday” bo Jisu thwimano muitu se khlaimani , palaimani(celebration) ya . Hakhe muitu narwkdi Jisu thwimano eba bo samung khlaima rokno Salbrum se muitu khlai tongdi.

- Tamo “Good Friday” salo bwkha khamnani(sad) de ? eba bwkha khamwi moknani de ?

baksa “Good Friday” ni sal-o muktwi phaiwi kaplai-o , Jisu satokjakmano muitu khlaima bai kaplai-o…
aboni bagwi Jisu tamo sakha naidi Bible

“27. Borok kwbangma bini uklok-uklok him laijak ; aboni bisingo bwrwirok baksa tongo , bohrok bini bagwi muisubuk chaui kap laijak . 28. Jisu uphilwi bohrokno hai hwnwi sakha , ‘Jerusalemni bwrwima song, nohrok ani bagwi ta kapdi ; sakni bagwi se kapdi , nohrokni bwsa rokni bagwi se kapdi .”(LUK-23:27-28)

Omo samung rok Jisu muchungwi se khlai-o ani bagwi , sakni bagwi kapdi , bwsarokni bagwi kapdi tamoni hwnkhe nwng sak Confirm khlaidi Mwthangjaknani , aphuru o bwrwimarok saui se manya je Jisu bohrokni Sumsok ni bagwi se satokjagwi Cross sakao thwinani nagkha , Jisu bo muchungwi se satokjagwi Cross thwi phai-o … aboni bagwi sakni bagwi se kapdi , sakni sumsok ni bagwi se kapdi.

Nwng tangwi Moknani nang ?
Jisu Cross o thwimani nwng Mogwi tongdi hwnwi de thwi rwlangkha ?
Mogwi tongyaui Kaitor no se hambai rwdi , bo nini bagwi thwi rwmani bagwi . Tongthokdi nwng phiyok jakha.

“17. Tamo khe Kaitorno hambai ma-rwo! salsa nohrok sumsokni seleng khatiui togmani ;……..
   18. Nohrok sumsokni yakni phiyok jagwi kahamni seleng wngkha “ (RUM-6:17-18)


Tabuk “Good Friday” no sabo palai man ?
Je Achai kwtal achaijak eba Sumsok nakarjak tei Jisu ni thwi no poito khlainai rok .

Nwng tabukbo achai kwtal  achaiya kho hwnkhe nini bagwi “Good Friday” ahaino se klaio tangwi hwnma le nwng Jisu thwi bai suchajak yak kho.

Achai kwtal achaijak rok bohrok salbrum se Jisu ni thwimano bwkha muitu toni-o “Good Friday” o simi ya…

Hambai .

Kaham-hamya tola o Comments khlaidi.